綁架聖母!

鬼馬的「大眼神父」在彌撒「收奉獻」(即收教友的捐錢，有基督教仍定每月為人工十分一)時，講個故事俾大家聽。故事嘅主人翁係一個小朋友，我哋循例叫佢小明。小明好想有一部單車，佢問佢媽媽，媽媽話如果你想要就祈禱求天主俾你喇！小明真係去祈禱，祈完禱之後佢寫一封信俾天主：「親愛嘅天主：我想要一部單車，我求你送一部單車俾我。」下款寫「愛你嘅小明」。佢寫完封信之後再睇睇，覺得封信寫得唔係幾好，佢撕咗佢再寫過：「親愛嘅天主：我想要一部單車，我求你送一部單車俾我。雖然我唔係好乖，但係我會改嘅喇！」下款寫「愛你嘅小明」。寫完之後佢又睇睇，覺得都唔係幾好，好似呃天主咁，因為佢知道嗰啲唔乖嘅嘢佢都唔會改嘅嘞！佢又將封信撕咗佢再寫過。

 

佢想認真啲，佢入聖堂再祈禱先。佢入到聖堂，跪喺度望住十字架上嘅耶穌。跟住佢見到十字架下面有一個唔係好大嘅聖母像，佢見聖堂裏面無其他人，就用件風褸包住個聖母像，拎咗佢返屋企！返到屋企佢再寫信俾天主：「天主！我想要部單車，我想你送俾我。你阿媽依家喺我手上，你知點做㗎喇！」下款寫「你知我係邊個㗎喇」。

 

佢話你地話唔定都用聖母要挾天主。